Aavaas
Apr 14, 20181 min
वैशाखै पिच्छे पलाउछन्
सपनाका हाँगा हाँगामा
अनगिन्ती नयाँ पालुवा
निरन्तर गाउछन्
तिनका सामु
कोइली, मैना, कोकले
र अनेकौं चराले
आदिम,
अमूर्त,
उनै पुराना पुराना गीत
पालुवाको संसारमा
एक निमेष पनि छाउन पाउदैन मौनता
अनवरत
केही न केही
सुसेली राख्छ बतास
कतै भेटिहाले भने
चिल्ला पालुवाले
छिनभरको शून्यसमय
बेर छैन
नव निर्वाचित सांसदले झैँ
उठाउन एकसाथ
आफ्ना सफा, हरिया हात
र सोध्न
मान्छेका बस्तीतिर फर्केर
एउटा प्रश्न-
मान्छे हो ! खासमा यो 'नयाँ वर्ष' भनेको
कुन चराको नाम हो ?