Aavaas
Jan 28, 20181 min
उतिखेर
तिमीले गरेथ्यौ
मीठा मीठा बास्ना
र मुलायम फलका कुरा
कुरै कुरामा-
गमलामा रोप्नू ! भनेर
दिएथ्यौ केही दाना बिउ
र साथै भनेथ्यौं-
'एकदिन यिनै बिउबाट उम्रनेछन्
स्वप्निल वृक्ष
र यथार्थमै फल्नेछन्
तिनका हाँगामा
सपनाका सुन्दर फल'
विश्वासका साथ
उतिखेरै
मैले रोपेथेँ
गेरुवा रङका आफ्नै गमलामा
तिमीले दिएका
तिनै चिल्ला र मिहिन बिउका दाना
आज
झुक्किएर उक्लिन पुगेछु
उही गमला सजाएको बार्दली
तिमीलाई थाहा छ ?
अहिले म एकनास टोलाएर हेरिरहेछु
गमलामा हुर्कँदैगरेको अकल्पनीय दृश्य
देखिरहेछु-
सुस्त बतासमा
बयली खेलिरहेछन्
मारिजुआनाका लहलहाउँदा केही हरिया बोट !